Android (Betriebssystem)

Android (vo änglisch android /ˈænˌdrɔjd/ vo griechisch androïdes menschenäänlig, Android) isch e Betriibssystem und au e Software-Plattform für mobili Gräät wie Smartphones, Handy, Natel, Netbooks und Tablet-Computer, wo vo dr Open Handset Alliance (gründet vo Google) entwicklet wird. D Basis isch dr Linux-Kernel. Bi Android handlet es sich um e freiji Software, wo kwelloffe entwicklet wird. Android het as Smartphone-Betriibssystem im zweite Quartal 2013 e wältwite Marktaateil vo 79,3 Prozänt ghaa nach 68,1 Prozent im zweite Quartal 2012, 52,5 Prozänt im dritte Quartal 2011 und 25,5 Prozänt im dritte Quartal 2010. Im April 2013 het dr Eric Schmidt, wo dr Executive Chairman vo Google isch, bekanntgee, dass pro Tag einehalb Millione noiji Android-Gräät aktiviert wärde. Das si knapp dreimol so vil wie no im Juli 2011. Sit em April 2013 gseet s aber us, wie wnn d Zaal vo de Neuaktivierige nüm wurd stiige. Bis zum Septämber 2013 si uf dr ganze Wält mee as e Milliarde Android-Gröäät aktiviert worde. Android het e Linux-Kernel, isch aber käi klassischi Linux-Distribution, wie mä sä für e Desktop und Server kennt. Zum Däil si Grundäigeschafte, wo mä bin eme unixoide System wurd erwarte, stark veränderet worde. Die noischti Version vo Android, wo allgemäin verbräitet isch, isch sit em August 2022 s Android 13 Tiramisu. Die gröschte Handyherschteller för Android-Handys sind Samsung, Xiami und Oppo. Google selber verchauft ebefalls Andoid-Handys as Pixel.